Me he tidlegare laga nokre innslag om den nye «Ljosheimparken» som no vert steld i stand i tilknytning til Evjeheimen. Her skal det lagast til eit fint uteområde som vonleg vil verte til glede både for dei som bur på heimen – og for dei som arbeider her. Anlegget vert og laga slik at folk som er rørslehemma skal få lett tilgjenge til parken. Som kjend tok moisund.com tidlegare i år eit initiativ til ei kronerulling med tanke på å gjeve eit bidrag til den nye parken. Mykje kronasje kom inn, både frå einskildpersonar og frå lokale verksemder. Pengene stend trygt på konto i sparebanken og ein høveleg sjekk vil kome styresmaktene på heimen i hende så snart tida er mogen for dette. I desse dagar er eit lag med handplukka, spesialtrente fagarbeidarar frå Evje og Hornnes kommune i full sving med hogst og grovplanering. Slikt arbeid må sjølvsagt planleggjast nøye, av omsut til både tryggleik og estetikk. Ljosheimparken tek form. Dag for dag. Eit nytt moderne hageanlegg i Evje sentrum. Ei frisk, grøn lunge i asfaltjungelen.
Ingen treng lure på kven som er anleggsleiar her. Furutrea vert lagt i bakken. Systematisk og målretta. På biletet kan det sjå ut som nokre tre er gløymd. Dette er nok berre eit spursmål om tid. ( foto T. Hodne )
Eit solid lag. Røynde arbeidsfolk, sterke i lekamen og godt førebudd på oppgåva som venter dei. F.v. Albert Kjetså, Notto Kjetså og Olaf Kjetså .( foto: T. Hodne)
Medan fotografen var tilstades ville gutane syne fram dei siste knepa og den siste utviklinga i moderne hogstteknikk. Når 3 mann er så samkøyrde som desse karane, er det sanneleg ikkje lenge å styve eit velvakse tre. ( foto: T. Hodne )
