Dirk og Wilma van Meurs

Tomt på 20 da – nytt hus og flunkande ny

bilverkstad i Iveland.

Foto: moisund.com

Dei kom flyttande frå Nederland i 2007. Etter ein tøff kamp mot det heilnorske byråkratiet kan dei endeleg stadfeste at det meste he falle på plass. Heilt uoppfordra trekk dei fram evjeguten Reidar Pedersen som ein god ven – og ein god hjelpar i startfasa. Ikkje noke bombe, spør du oss.

Siste laurdagen i mars bed dei inn til gjestebod. Opent hus. I den nye verkstaden. Moisund.com fær servert kaffe og rykande fersk heimebakst då me vitjar det trivelege ekteparet. Gjestfrie, smilande og med tru på framtida. Ei framtid i Iveland.

På ytterveggen heng skiltet som stadfester at dette er ein autorisert og offentleg godkjend bilverkstad. Dirk er ein røynd bilmekanikar. I nærare 30 år praktiserte han yrket i sitt tidlegare heimland. Han opna verkstaden for vel 3 veker sidan. Avtaleboka er alt meir enn full. Arbeidsdagar på 12 timar. Kundane kjem frå heile Sørlandet.

Me tillet oss, spøkefullt, å kalle Wilma for « assisterande verksmeister.» Ho smiler venleg og sier ho sjølvsagt vil hjelpe til i verkstaden så mykje ho kan. Truleg he Wilma full jobb. Ein romsleg bustad, 20 mål tomt og 3 born.

Trivelege folk. Gilde folk. Ny verkstad og himla god kaffe.  Kundane bør strøyme til Dirk og Wilma i framtida.