Bortelid Mat opna i Bortelid.

Mange hadde nok vore skremd av å opne ein ny butikk på fredag den 13. Slik er det ikkje med dei to damene Tonje Jacobsen og Elin Eikild. Dagen som mange reknar som ein dag som ein ikkje skal gjere for mange sprell, vart for desse friske damene vald som dagen då den nye butikken i Bortelid skulle opnast. Frå denne dagen vil dei halde ope kvar dag utover vinteren, sundagen inkludert! Det var knytt stor spenning til opningsdagen, ramma kring var ideell. Ei strålande sol som varma godt opp i solveggen. Ville den nye dataterminalen fungere? Ja sjølvsagt gjorde den det og alt ein time etter opning kunne dei begge to slappe av og sjølv smake på kaka og kaffien som dei serverte alle kundane på opningsdagen.

Bortelid har og tidlegare hatt butikk, men vanskar med drifta gjorde det naudsynt å endre lokala og vareutvalet. Etter at Bortelid Marknad stengde døra i fjor vår har lokala vore gjennom ei fullstendig forvandling. Tilbygg er kome til og arealet er auka med rundt 45 m2. Eit eige kjølerom er på plass og vareutvalet er stort sett som i ein vanleg Joker butikk. Prisene like så. Me hadde ein prat med dagens fyrste kunde som hadde sett fram til denne dagen i lang tid. Thor Gundersen har hytte på Panorama og stod klar då dørene opna presis kl 10:00. Han var nøgd med det han såg. Fantastisk utval og greie priser. ” No har Maxi på Lund mista ein kunde”, sa Thor. Heretter skulle all handel i samband med turar til hytta skje på Bortelid Mat. Og denne karen, han er på hytta si i Bortelid kvar helg gjennom heile vinteren. Han meinte det no var viktig at alle gjer som han, på dette viset vil ein i framtida kunne oppretthalde drifta av den nye butikken. I framtida skal det vere mogleg å bestille varer via internett/faks slik at desse er ferdig pakka når ein kjem opp på hytta. Dette er service, noko dei to damene er kjend for!

Det nye kjølerommet rommar det meste ein treng av ferskvare for ei helg på hytta

Thor Gundersen og Ole Petter Nielsen. Dei to fyrste kundane i den nye butikken koste seg med gratis kake og kaffi. Det einaste dei meinte mangla var indrefilet av storfe, Brasiliansk storfe... 

Den nye betalingsterminalen fungerte når Thor Gundersen drog kortet som fyrste kunde

Asborg og Oddvar Hærås frå Nodeland har feriert i Bortelid sidan 1976. Dei har begge sakna butikk i Bortelid og gler seg til igjen å kunne handle lokalt

Mathias Sørstrand (4 år) og Krister Sørstrand (6 år). Begge koste dei seg med kake i butikken og såg fram til morgondagen då dei skulle renne i skibakken

Frå venstre Elin Eikild, Gry Anita Thorsland, Tonje Jacobsen og Hilde Reiersdal. Det vart litt tid til ein kjapp kaffitår og eit lite kakestykke mellom kundane på opningsdagen.