Erling Haugaa

Fotografen som vart grossist på kattemat

Erling Haugaa var i si tid ung og lovande. I dag er han i det minste ein lovande forretningsmann. I nærare 40 år dreiv han som fotograf med tilhøyrande spesialforretning i Evje sentrum. Tusenvis av soldatar på Evjemoen høyrde til den faste kundekrinsen. Brått forsvann soldatane. Brått kom dei digitale fotograferingsapparata. Erling måtte endre kurs. No sel han bortimot 2 pallar med kattemat og hundefor i månaden. Fotografen lever framleis men han er mindre etterspurd enn tidlegare.

Det er heilt uråd å nemne alt kva du finn i hyllene hjå Erling. Me kan nemne sko, kjøkkenutstyr, motorolje, snøfresarar, plenklypparar, kunstnarartiklar, utstyr til hund, hest og katt, verktøy, arbeidstøy, kondomar, pipesett, båt, årer og sjokolade. Du lyt oppleve dette sjølve. Eit vareutval du ikkje finn makan til nokon stad i røystekrinsen.

Erling kan framleis sitt gamle fag. Passfoto er framleis ei etterspurd vare.

Sjølv om mange no lagrar eigne bilete på datamaskinen, eller på eigne CD plater, så er det framleis ein del som ynskjer bilete på ein god papirkvalitet.

Dette ordner Erling Haugaa på beste måte. Her er fagmannen på heimebane. Han talar gjerne i timevis om kvalitet på bilete, fotopapir og om korleis millionar av bilete kvart år forsvinn fordi folk ikkje heilt veit korleis ein skal take vare på slikt materiale.

Framleis full drift i rammeverkstaden i kjellaren på forretninga.  Stolt syner Erling fram ei ramme som er produsert med hjelp av trevirke frå eigen skog. Dette har vorte umåteleg populært. Etterspurnaden er større enn kva Erling makter å produsere. Fotografen som framleis er stolt av sitt fag, men som heller ser eit framtidig levebrød i proteinrik kattemat og motorolje til halv pris.