På attande året i kulturens teneste!

Revygruppa MORUS (Moi og Omegn Revygruppe for Uutforska Sjeler) vart stifta i 1992. Moi er grenda heilt sør i Evje og Hornnes kommune kor skule, butikk og posthus er lagt ned, men kor humøret framleis er på topp. Med sine rundt 160 røysteføre innbyggarar har grenda kvart år sidan den gong sett opp ein revy. Fram til no har rundt 16 000 menneskje vitja dei 17 revyane dei har hatt. Dette betyr rundt 100 billettar for kvar røysteføre sjel i Moigrenda. I den same perioden har revygruppa stått på scena i rundt eitt og eit halvt døger til saman. Dei har framført ein stad omkring 300 ulike innslag kor 95 % har vore sjølvskrivne.

No er dei klar igjen, for 18.gong. Dei rundt 1000 billettane til revyen ”Bomber og granater” er i ferd med å bli seld ut etter ei snau vekes sal. Tekstane byrjar å sitje og scena på Evjemoen er ferdig rigga. Torsdag den 12. Februar kl 19.00 brakar det laus med premiere og dei to påfølgande dagane vert det nye framsyningar.

Det er stort sett dei same folka som er med i revygruppa no som i 1992. Difor må det må kunne seiast at det er ein røynd gjeng med amatørar som entrar scena på Evjemoen til torsdag. Ein gjeng som synast den største gleda ein kan ha er å gjera andre glad!

For meir informasjon, sjå på www.morus.info