Risdal Touring – 10 års jubileum

Ei verksemd i medvind.

Olav L. Risdal (t.v. ) og Tom Roger Øydne.  ( foto: moisund.com )

Med Europakartet som bakgrunn tek me bilete av dei to «Vangsgutane» Olav Risdal og Tom Roger Øydne. Dei he bortimot heile denne verdsdelen som sin arbeidplass. Få, eller kanskje ingen i dette landet, he meir røynsle som turbilsjåfør enn nettopp ungguten Olav Risdal. Saman eig desse gutane verksemda Risdal Touring. Ei verksemd i vekst. Ei verksemd i medvind. Dette året kjem dei til å sende meir enn 5000 kundar ut på spanande turar i inn- og utland. 70 % av reisene går til kjende og ukjende reisemål under fjerne himmelstrok. Tallinn, Bratislava, Balkan, Bornholm, Praha eller Wien. Risdal Touring he kring 25 personar på lønningslista og forventa omsetnad inneverande år er rundt reikna 22 millionar kroner. Stadig nye kundar tek kontakt. Eit solid handtverk, både i administrasjonen og bak rattet, gjennom mange år, gjer at Risdal Touring he eit svært godt omdøme langt ut øve vår eigen region. Dette er fagarbeid, og Tom Roger er vel ikkje langt unna sanninga når han seier at « kundane er sjølve limet i heile verksemda-utan nøgde kundar vert det lite attende av Risdal Touring.»

Foto: Astrid Undeland

Både Olav og Tom Roger set sjølvsagt umåteleg pris på kundane sine. Det synte dei, utan atterhald, då dei laurdag inviterte både kundar og samarbeidspartnarar til «reisetreff» på Evjemoen. Meir enn 300 personar møtte fram til ein minneverdig dag. Risdal Touring syner at dei kan dette med å vere vertskap. Ikkje berre ombord i ein turistbuss. Heile gjengen fekk ei rundreise i bygda vår. Ei rundreise dei seint vil gløyme. Denne helga fekk såleis Evje & Hornnes kommune fleire hundre nye ambasadørar. Eit stopp på den vidgjetne « Hannåsvollen Gård» vekkja åtgaum hjå den reisevande møtelyden. Det same gjorde ein tur til Fennefoss og eit kort opphald ved handlesenteret i Dåsnes. På « Major-stuen», matstova inne på Evjemoen, fekk dei servert gourmetmat av beste slag. Matøkta vart sjølvsagt eit høgdepunkt. God mat, godt drikke og den gode samtalen. Gjennsyn med gamle turkameratar og avtale om nye reisemål. Kan hende sjåast dei att på Nordkapp, i Sarajevo, ved Balatonsjøen eller i slaktarbutikken i Hirtshals. Verda er liten når du er kunde hjå Risdal Touring.Det vart og ei minnerik oppleving då Knut Kjetil Møen og Inger Lise Stulien Robstad klemde til med ein fantastisk konsert i ein fullsett kinosal. Mange bør – og skal takkast etter ei slik høgtidsstund. Me kan ikkje nemne alle her i denne bolken. Me kjem attende. Kva hadde vel Risdal Touring vore utan sjåførar i eliteklassen og utan ein håndplukka, strålande gjeng i administrasjonen. Svaret gjev seg sjølve. Me kjem attende til desse flotte medarbeidarane. Dei fortener eit eige oppslag. I fargar. Til slutt vil me sjølvsagt gratulere Risdal Touring med åremålsdsagen.