Truls vert sjef i bingohallen

Evje Bingo opnar dørene den 15.mars

Truls Johansen, mangeårig journalist på radio Loland, er tilsett som dagleg leiar på Evje Bingo. Verksemda opnar dørene 15. mars – klokka 15:00.

Det er i lokala til Anne Sylvi Haugen, på Verksmoen, det no vert pengespel på høgt, proffesjonelt nivå. Førebels vert det to tilsette i bingohallen, men Johansen seier til moisund.com at dei alt no er på jakt etter vikarar som kan trø til når det vert naudsynt. Opningstidene vert frå klokka 12:30 – 20:30 frå mandag til fredag. Laurdagen  er dynna lukka. Sundag er opningstida frå 14:30 – 22:30. Det vert ikkje matservering i spelehallen men frå blankpolerte automatar kan du handle både kaffe, brus og sjokolade. Dette må du ordne heilt på eiga hand. Lokala vert delt opp i to ulike bolkar. Ein bolk for dei som ikkje likar tobakksrøyk – og ein annan bolk for dei som vil nyte kvelden med Evergood kaffe, firkløver og Petterøes nr 3.  På Verksmoen kan du altså røykje så mykje du vil medan du satser månadsløna i ein topp moderne spelehall.

Det er Bingo Sør som eig den nye verksemda på Evje. I tillegg til 7 eksisterande bingohallar på Sørlandet vert det no opna nye avdelinger i Mandal, på Vanse – og altså på Evje.

Dette er pengespel som er underlagt streng offentleg kontroll. Aldersgrense i lokala vert 18 år, og dette er ei grense som Truls seier dei kjem til å vere strenge på. Heile 60 prosent av innsatsen vert betalt attende til spelarane i form av premiar. I fjor mottok lag og foreninger på Sørlandet kring 10 millionar kroner i utbetaling frå tilsvarande spelehallar. Her vil det altså drype gode tilskot til lokale klubbkasser.

Utstyret som vert montert på Verksmoen er det mest moderne som i dag finnast på marknaden. Einskilde av maskinane he aldri vore prøvd ut i Noreg tidlegare. Her kan du spele kryss-spel mot andre stader på Agder, eller du kan, som i gamle dagar på Evje Kino, site med kulepenn og krysse av på ei bingoblokk. Det vert plass til vel 70 personar, både røykjarar og ikkje røykjarar.

På sjølve opningsdagen vert det truleg eit himla liv. Då kan Truls & co freiste med verdfulle gåvekort, kaffe, vafflar, blautekake og tidtrøyte av ulik slag. Det vert det vonleg folkevandring til Verksmoen, sundag den 15.mars – klokka 15:00.