Evjetun – største overnattingsverksemda i bygda.

Sundag 29.mars vart det beden til gjestebod.

Foto: moisund.com

Sentrale personar i samband med utbyggjinga ved Evjetun. Framme f.v: Aslak Eppeland og Egil Galteland.  Bak.fv: Roald Galteland og Helge Norheim

Sundag vart det skipa til stor fest på Evjetun. Bordsete til kring 300 festkledde mennesk i alle aldre. Sola skein frå nærast skyfri himmel, flagget til topps og berre blide andlet å sjå. Offisiell opning av av ei særs vellukka utbyggjing av den vidgjetne leirskulen. Fyrst var det omvisning, frå kjellar til loft. Kaffe, sjokoladekake - og kake med marsipanlok på matsetelen. Så var det fest. Song, talar, helsinger og lovord. Ein stolt byggjekomite og ein imponert møtelyd.

Egil Galteland. Ekte evjegut, sjølv om han flytta frå bygda tidleg på 60-talet. No he han vore leiar av byggjekomiteen på Evjetun. I dag ein stolt og audmjuk leiar. Dugande fagfolk i alle bolkar gjer at han – og resten av gjengen, kan syne fram eit moderne praktbygg.  Galteland vil gjerne trekke fram hovudentrepenøren, Smeland Byggservice. Ein fantastisk gjeng som he utført arbeidet på ein framifrå måte. Heilt etter læreboka , og ikkje minst,  heilt etter den oppsette timeplanen.

Kari Bransdal, med tette røter til Moisund, er dagleg leiar på Evjetun. Denne dagen hadde Kari mange gjeremål, og det vart lite tid til naudsynt merkantilt arbeid i timane før festen tok til.

Å vere styrar på Evjetun krev ein leiar med stø hand – og ikkje minst eit klårt hovud. Det kjem truleg som ei overrasking på dei fleste sambygdinger når Kari kan opplyse at Evjetun kvart einaste år he tett på 10 000 overnattingsgjester. Den største overnattingsverksemda i bygda.

Tid for oppsummering. Tid for ettertanke. Ein snau time før møtelyden tek sete i festsalen. Roald Galteland kan sjå attende på meir enn 1000 dugnadstimer i samband med utbyggjinga. Imponerande. Han fortente eit ekstra stort kakestykke denne dagen. Evjeguten, Roald Galteland.

Så kom møtelyden. Bil etter bil. Festkledde folk – med og utan bunad. Med og utan handveske. Stø kurs mot matsalen, festsalen og ein gild ettermiddag med mellom anna leiaren i NLM, Ernst Jarle Halsne – Flekkerøygutane og Ruth Simonsen på gjestelista.