Vyrde redaktør.

Lat meg få lov å peike på ein fundamental informativ svikt ved reportasjen dykkar frå strikke-kafeen på Bestestaua. Kvifor i all verda skulle Marit Leesland, ei oppgåande dame frå kulturbygda Iveland strikke genser til Jan Olsen frå Jordalsbø?

Saka er denne: Marit Leesland har lenge vore tilsett i Pr-avdelinga hjå eit ikkje heilt ukjent sykkelprosjekt. I vinter tok ein liten svipptur til dalstroka utanfor, til Karibien, for å sjå korleis prosjektet sin PR fungerte under palmene. Ho blei jupt såra og vonbråten då ho fekk sjå at grunna Olsen sin manglande brystmusklatur, reklamerte den førre genseren hennar for feil prosjekt. Når Olsen gjekk med armene naturleg langs sida, sto det på brystet hans "KLER TIL CU". Ikkje før jordølen slo ut med armene såg ein den korrekte teksten "SYKLER TIL CUBA".(bilete nr.1)

Marit hadde då to måter ho kunne ordne problemet på. Ho kunne få auka Olsen sin brystmusklatur eller strikke ny genser, truleg med teksten vertikalt. Reportasjen frå Bestestaua syner kva måte ho fann enklast.

Sykkelprosjektet, som nå går inn i sin tiande sesong, kunne sist vinter gle fattige cubanarar med endå to sykkel-containerar . Ein av dei finaste syklane kom, ikkje uventa, frå sykkelbygda Moisund, Sonja Langeid sin raude DBS. Ein anna raud DBS, kom frå Jortveit, frå ei av døtrene til Johnny. Det var gome Sigrunn Smeland, ei dame av den rause sorten, som fekk lurt sykkelen avgarde til Cuba. Og skulle nokon frå dalstroka innanfor forville seg inn i den berykta bydelen Jesus Maria i Habana, kan dei risikere å treffe på ein liten gul sykkel med reklame for Evje Elektriske AS. Det skuldast at Dag Odde, slik gode setesdøler bør, ringte 90940437 og tømte garasjen for syklar som ungene hadde vakse ifrå.

Ein bør og merke seg at redaktør Moi var ein av pionerane då han for ni år sidan, truleg under eit av sine jamnlege anfall av cyklofobi, sende heile tre syklar til Cuba.

Vyrdsamt Jan Olsen

Sjå artikkel frå strikkestova her!