Mykje folk og
fantastisk stemning i Ivelandshallen på fredagskvelden.
Lindesnes Trekkspillklubb, i hop med gode vener, vitja
kulturbygda.
Mykje godtfolk var
samla under same tak. Siggen Høyland, Atti Eikaas, Magne
Kjetså, Olaf Engestøl, 3 generasjonar Stulien, Per Moi, Tora
Honnemyr og ein dyrlækjar frå Syrtveit.
Eit udiskutabelt
høgdepunkt vart det då Mathilde Marker, 90 år gamal, kleiv opp
på scena og klemde i veg med den kjende salma « O store Gud.»
Ikkje eit auge var
turt. Folk såg på kvarandre og trudde knapt kva dei høyrde.
Publikum reiste seg og gav Mathilde ein velfortent applaus. Ei
sterk oppleving. Eit musikalsk høgdepunkt.
Sjølv røynde
medlemmer av trekkspillklubben vart sitjande å måpe då Mathilde
serverte salmesong, akkompagnert av Atti Eikaas & co.
Lindesnes
Trekkspillklubb – ein samskipnad av entusiastar i alle aldre.
Felles interesse
for trekkspel, song, musikk og ekte livsglede. Totalt reinska
for stjernenykker, snobberi og anna tullball. Jordnære folk med
trufaste tilhøyrar øve heile Noreg – og halve Amerika. Snart
vert dei å høyre i den Norske Opera.
Neste år, på Kong Harald sin åremålsdag den 21. februar, kan
trekkspillklubben feire 20 års jubileum. Slikt bør feirast på
kvit marmor – i Bjørvika.
Skal det svinge
skikkeleg i lokalet må det ofte supplerast med eit og anna
instrument i tillegg til trekkspel og torader. Ingen tvil om at
denne jenta var eit godt supplement i så måte.
Når Lindesnes
Trekkspillklubb dreg i gong ein feiande vals – ja då er det
vanskeleg å sitje roleg på ein billig plaststol frå IKEA. Dette
unge paret svinga seg gladeleg i valsen. Nokre feilsteg såg me,
men ikkje skjemmande. Ein fantastisk kveld. Kulturbygda Iveland
he klart det endå ei gong.
Klikk på bileta
under, og dei vil endre storleik. I tillegg kan du sjå film, frå
festkvelden,
produsert av moisund.com – TV. I fargar.
