Maskinsalg på Evje

Satsar friskt og meir enn dobblar butikkarealet.

Helge Roland (t.v.) og Petter Hegland.

Dei satsar friskt, gutane hjå Maskinsalg på Evje. Like etter påskehøgtida tek dei i bruk ein flunkande ny butikk. Arealet vert meir enn dobbla i høve til noverande lokale. Totalt fær dei no kring 700 kvm å boltre seg på.

Vareutvalet kjem til å verte noke av det same, men i fylgje unge Hegland vil dei no få betre høve til å stille ut varene på ein vetug måte. Det som tidligare he ligge nedstuva i pappesker på eit mørkt lager vil no finne sin plass i moderne hylleseksjonar i den ljose, fine forretninga. Då moisund.com  vitja forretninga ein tidleg morgon var det alt full aktivitet. Leverandørar av ulike slag hadde funne sin tilmålte plass. Det vrimla som i ei maurtuve. Vareplassering kallast slikt på fagspråket. Den einaste av dei tilsette som verkeleg he skjøna kor mykje arbeid dette eigentleg  krev, er sjefen sjølve – Atle Hægeland. Han he reist på jordomseiling og kjem ikkje heimatt før den nye forretninga er klar til bruk. Då vert det garantert gode tilbod, prutningsmon og høve til ein triveleg handel på Verksmoen. Dei he røynsle for slikt. Gutane hjå Maskinsalg.

Petter tilstår, utan atterhald, at skal dei få dette til å sjå greit ut så må det kvinnfolk inn i biletet. Han vart hoppande glad då Inger Larsen frå verksemda «Helly Hansen» dukka opp på åstaden. I bolken for gode, varme og turvande  arbeidsklede var det i alle fall full kontroll. Korleis det ligg til rette i avdelinga for motorsager, plenklypparar og spenefeitt veit me beint fram ikkje. Ikkje alt kan synast fram til pågåande bladfykar, kort tid før opningsfesten.