|
«SKI EXTREME 09»
Luftige svev og
folkefest på Bortelid.
Foto: moisund.com
Det er ikkje noke
halvvegs når gutane på Bortelid Alpinsenter bed inn til fest.
Full pakke, spektakulært, solid gjennomført og kvalitetssikring
i alle ledd. Laurdag var det klart for « Ski Extreme 09».
Vårsola skein frå skyfri himmel. Ikkje eit vindpust. Det
strøymde på med folk frå tidleg morgon. Kring 1000 mennesk vitja
skisenteret denne laurdagen. God mat, godt drikke og eit
tettpakka program. Det vart ein folkefest.
På programmet stod
mellom anna borneskirenn, skvetthopprenn, snøskuteroppvisning og
bilkøyring i alpinbakken. Bilforhandlarar frå byen stillde med
blankpolerte bilar med trekk på alle 4 hjula. Tevlinga gjekk ut
på kven som kunne køyre lengst opp i skibakken før naturkreftene
krevde at dei måtte setje bilen i revers. Dei kom ikkje langt av
garde korkje Mitsubishi, Citroen, Subaru eller BMW. Dei grov seg
ned i djupsnøen etter få meter. Det lukta klutch.
Så kom ein innfødd
Åsdøl i ein kolsvart pickup. Han kleiv heilt til toppen.
Applaus frå eit
talrikt publikum – og bilbransjen he fenge noke å tenkje på.
Imponerande var
det så avgjort å sjå ungdomen som boltra seg på skvetthoppet.
Føtene opp, hovudet ned – og dei vrei seg som ein korketrekkar i
lufta. Dei fleste landa med skia trygt i snøen, og sklei elegant
øve målstreken med eit stolt smil . Some landa med hovudet fyrst
i snøen. Det var ikkje råd å sjå om desse smilte….
Då den oppveksande
slekt frå Kylland, Kyrkjebygd og Bortelid trilla inn på åstaden
med blodtrimma snøskutarar, ja då vart det fullt på tribuna. Ei
imponerande oppvisning. Maskineriet heldt seg mest i lufta. Det
var lite dei var i kontakt med snøen.
Eit helikopeter
svirra i luftromet øve Bortelid heile laurdagen. Mange nytta
høvet til ein luftetur i fjellheimen. Mot eit aldri så lite
salær kunne du sjå fjellheimen frå si aller beste side.
Moisund.com tok seg ein tur opp i stratosfæren for å filme
folkefesten frå lufta. Ein tøff tur. Meltinga kjem truleg ikkje
i lage før halvvegs ut i neste veke. Journalistyrket vert
tøffare for kvar dag.
Klikk på bilet
under – og du vil få fleire glimt frå folkefesten på Bortelid.
|
