Kulturbygda Iveland

Strikkekafe på Bestestaua

Foto: moisund.com

Ragnhild Lilletveit ( t.v. ) og Evelyn Honnemyr.

Fyrste torsdagen i kvar månad samlast jentene i Iveland til strikkekafe på

Bestestaua. Frammøte varierer ein del. Det skjer så mykje i Iveland.  På det meste kan 20 strikkeglade jenter, i sin beste alder, vere samla til sosialt samvær  - og eit grann håndarbeid. Kaffe, kake, is og anna helsekost høyrer med på ein slik kveld. Her er trivsel, ein god latter og den gode samtalen dei viktigaste punkta på programmet.

På sist møte hadde dei vitjing av filledokka Annemor Sundbø. Ho heldt eit spanande foredrag som dei fleste meinte hadde tittelen « Ånden i fillehaugen.»  Ja, ja – same kva det heitte, moro var det likevel seier Marit, og resten av strikkegjengen ler så det skranglar i stoveglasa.

Marit Leesland syner fram det som er fyrste runde på det som til slutt skal verte ny genser til den ikkje heilt ukjende Jan Olsen frå Jordalsbø.

Ruth Tveit (t.v.) strikker ullundertøy til kjærasten Anders. Han ligg mykje på skogen om nettene og filmar både gauk, harepus og kattugle. Då kan det vere kjærkoment med varme klede innerst mot lekamen. Her fær Ruth gode råd av Marit Leesland. Kan hende er det fargen dei diskuterer….

Snart er det grunnlovsdag i Iveland. Ruth Fjermeros er i full sving med å spøte ullsokker til Ivelandsbunaden. Framifrå handtverk, så langt me kan skjøne.

F.v. Evelyn Honnemyr, Marlyn Eieland og Ruth Tveit.

På neste møte i strikkeklubben er det venta storfint besøk. Laila Bakken kjem på vitjing og skal lære jentene å strikke med ull « beint frå sauen.»

Så brakar diskusjonen laus – så kjem nokre kraftige latterkuler – og så er det vel Ragnhild som meiner at det  ikkje kan vere beint frå sauen, men beint frå fellen. …

Svaret fekk me ikkje denne kvelden. Me lyt vente til fyrste torsdagen i april. Då kjem me attende, og då vert det truleg trongt om plassen på Bestestaua. Med – eller utan Spelsau.