Kvareng og Hansson

To gutar med tru på framtida.

Johan Kvareng driv den største turistverksemda på Moi. Gokartbanen. Vegard Hansson driv den største turistverksemda på Hornnes. Setesdal Mineral Park. Saman er dei dynamitt. To gutar som kvar einaste sumar dreg tusenvis av turistar til bygda vår. Johan he budd så mange år på loptet på gokartbanen at han no vil søkje om å kome i manntalet i den lokale røystekrinsen.  Det he så langt vore ein god sesong seier Kvareng som kvart einaste år he ein innleigd arbeidsstokk på 12 – 14 ungdomar frå lokalmiljøet. På denne sida av sumaren er det mest skuleklassar og ulike firma som leiger banen. Etter skulestart er det bom stopp på den ordinære turisttrafikken seier Johan Kvareng. Han veit kva han talar om. I meir enn 20 år he han levd blandt svidd gummi, grillpylser og fri eksos på bilbanen på Moi. Om vinteren trekkjer han mot kysten – og varmare strok. Like sikkert som Linerla tripper på tunet så kjem Kvareng til Moi når snøen forsvinn.

Dette laftehuset, som er meir enn 300 år gamalt, he vore utleigd i heile sumar. Eit populært sumarhusvære som du truleg ikkje finn maken til så mange andre stader i landet.

Vegard Hansson i ”Mineralparken” he i år registrert ein liten nedgong i besøkstala. Likevel ikkje meir enn den generelle nedgongen i turistbransjen. Mellom anna så he trafikken av cruisebåtpassasjerar til Kristiansand svikta med 71 %  dette året. Den Europeiske Kulturhovudstaden, Stavanger, registrerer ei kraftig auke i talet på cruisepassasjerar. Slikt merkast sjølvsagt hjå våre lokale reiselivsbedrifter. Vegard Hansson er likevel ikkje pessimist. Full av pågangsmot, og med tru på framtida, veit han at i denne bransjen så peiker kurvene både opp og ned. Neste år he han planar om at Mineralparken skal framstå meir som ein aktivitetspark. Borna skal setjast i fokus. Ikkje hoppeslott, sukkerspinn og karusellar. Sjølvsagt er det stein og mineralar som kjem i fokus også her. Borna skal drive med figurskjering i stein, lage sine eigne smykker og kanskje drive med ”fossilpreparering.” Me fær ikkje alle detaljene.  No planlegg Vegard å setje opp ein del  nye lafta bygninger i parken. Ikkje med lokalt laftetømmer frå Hornnes Sagbruk. Nei, Hansson vil no lafte hus og hytter av stein. Produsert i Kina, montert på Hornnes og fullstendig vedlikehaldsfrie. Dette må vel kallast nytenkjing. Det er slik forretningsfolk kjem vidare. ...

Foto: Odd Magne Strømstad

Vegard Hansson sat i styret i det lokale reisetrafikklaget  i to år. Han registrerte ikkje ei einaste sak som dreide seg om å trekkje fleire turistar til Evje & Hornnes. Tvert i mot. ” I dag driv Reisetrafikklaget mest med eigedomsutvikling. Styret bruker det meste av tid og ressurser på å drifte Informasjonsbygget  i Evje sentrum. ” seier Vegard og kan fortelje om vidare planar for utviding av drifta ved Setesdal Mineral Park. Store og konkrete  planar. Me skriv ikkje om dette førebels. Tidene, konjunkturene og turiststrøymen til Sørlandet er sjølvsagt med i planprosessen. På Evje sit reiselivsnæringa og planlegg framtida i ei lafta trehytte. På Auensneset sit snart Vegard Hansson og planlegg den same framtida i ei hytte, lafta i Kinesisk marmor. Kva som er mest solid, med tanke på framtida, lyt andre gjere seg opp ei meining om.....

Det vert lagt opp til eit omfattande aktivitetstilbod  for born i Mineralparken neste år