Fredag den 7. november og Heradstyret tok sete i tingsalen.

Blomkålsuppe, flygarutdanning og busetjing av flyktningar.

Torunn Bjoraa (Krf) og den mektige rektoren på ungdomskulen, Kjell Hansen.

Det er ikkje mykje teikn til korkje dramatikk, trugsmål eller uvenskap i samband med møta i Heradstyret. Dei fleste sakene vert vedteke samrøystes. Slik vart det også denne fredagen i byrjinga av november. Ei viss spaning vart det likevel då den gamle ringreven Sigmund Monen ( Krf) tok sete blant dei folkevalde. Mange frykta at no var tida mogen for ein ny og lang museumsdebatt i samband med budsjett og økonomiplan. Sigmund var tagal. Sat for det meste med bøygd nakke og attlatne augo. Ei politisk karriere er på hell.

Ingen les sakspapira meir grundig enn «røysta frå Kleveland.» Stø som grunnfjellet, røynsle, trufast mot talemålet og hovudfagseksamen i statsvitskap. Sjølv Dreng Homme vågar ikkje å ordkløyvast veteranen frå Senterpartiet. Ein av dei få her i dalen som var på førenamn med Per Borten. Statsministeren.

Før alvoret tok til i tingsalen så vart dei folkevalde beden på omvisning på det nye skulekjøkkenet på Evje. Her vart det skjenka blomkålsuppe og rundstykker. Ordføraren var, slik offentleg etikette tilseier, fyrst i matfatet. Han tok til seg dugeleg i fleire vender. Det same gjorde Egil Kjebekk.

Line Vennesland (Ap) er på full fart mot Løvebakken. Neste år, på denne tida, sit ho truleg og et stompeskjeve i Stortingsrestauranten. Dette vart ei grei generalprøve på bordskikk og høveleg framferd.

 

Dreng Homme vart mektig imponert då Sigurd Auestad, på vegne av m.a. «Luftfartshøyskolen Sør – LHFS» presenterte planane for ei bachelorutdanning av trafikkflygarar og flygeleiarar på Evjemoen. Eit stort prosjekt i nasjonal samanheng og eit eventyr for vår vesle innlandskommune. Planlagt skulestart er hausten 2009. Ein tek sikte på å utdanne 68 studentar kvart år. Elevane skal innkvarterast i dei gamle mannskapsbrakkene i søndre leir. Det skal kjøpast inn 4 motorseilfly og 3 flysimulatorar. Utdanningsprosessen vil foregå både på Evjemoen og i Froland. 50 nye kjærkomne arbeidsplassar. Proffesorar, lektorar og amanuensar medrekna. I fylgje Auestad er store delar av luftfartsmiljøet i Noreg svært positive til dette prosjektet. Det same er Avinor. No er fyrste prioritet å få tak i naudsynt kapital. Våre vener på Agderbenken he såleis ei viktig oppgåve fram mot revidert Nasjonalbudsjett. Knut Karlsen kan framleis sove godt om nettene. Det vert ikkje støy av desse nye skuleflya. Korkje på Grenjå eller på Gudvangen. Dei bråker ikkje meir enn ein middels stor sjølvgåande plenklyppar frå Maskinsalg. Ikkje meir enn ein pensjonert embetsmann kan – og bør tole.

Eit lite paradoks i det heile er det likevel at i Oslo, med kontor på Stortinget, sit Kjell Ingolf Ropstad og kjemper for meir pengar til jernbane og snøggtog. På Evje sit hans aldrande far, ordføraren, og kjempar for titals millionar kroner til flytrafikk på Evjemoen…. Same parti - og eplet fall denne gong svært langt frå stammen.

Eit samrøystes Heradstyre vedtok  å take i mot 15 nye flyktninger, hjelpe Setpro som treng meir kronasje, revidere eksisterande kommuneplan og auke låneramma til Setesdal Miljø og Gjenvinning. Eit samrøystes Heradstyre fekk kraftig og velfortent kjeft av leiaren av kontrollutvalet, Bjarne Johansen. Heile møtet vart sendt beinveges på Evje Radio. Dreng Homme var på talarstolen 14 gonger. Olav Arne Kleveland berre ei gong.