Maskinsalg på Evje

Dobblar butikkarealet.
Ein stødig gjeng : Bak f.v. Petter Heggland og Helge Roland. Framme f.v.  Stig Berge og Atle Hægeland.

Maskinsalg etablerte seg i Arendalskrysset, nord for Evje sentrum, så tidleg som i 1974. Få år seinare var dei på plass med ny forretning, verkstad og stort lager påVerksmoen. Omsetninga  auker kvart einaste år. Saman med avdelinga på Hægeland vert det no omsett varer til jord, skog, hus og hage for om lag 30 millionar kroner i året.  Kraftfor og kunstgjødsel er ein viktig del av omsetninga. Det same er maskinar og utstyr frå leverandørane Honda og Husqvarna. Motorsager, snøfresarar og plenklypparar frå Maskinsalg finn du snart i kvart eit gardstun i dalen. Kundane kjem frå heile Setesdalen. Frå Åseral, Bjelland, Åpåsland og Birkeland.

No er forretninga i minste laget. Kapasiteten er sprengd. Like øve nyttår kjem Vidar Smeland & co. for å starte ombygging av butikklokalet. Atle Hægeland er sjef på huset og ser ljost på framtida. Trufaste kundar og fagleg dyktige medarbeidarar er ein av grunnane til at han no doblar arealet på butikken. Når den nye forretninga er klar, ei gong ut på vårparten, vil han få kring 600 kvm å boltre seg på. I tillegg he han altså eit lager på storleik med ein fotballbane med internasjonale mål. Det gjeng rette vegen på Maskinsalg. 

Petter Heggland er fødd og oppvaksen på Kjetså. Til dagleg finn du denne smilande og omgjengelege karen bak disken hjå Maskinsalg.  Ein gild gut som kundane vel å setje umåteleg pris på. Det he me nemleg høyrd. På bygda.