Kommunetoppar frå Kristiansand på skuletur.

Ein spade er framleis ein spade

Eit spenstig oppslag i Fevennen, laurdag 8.november, fortel om 38 rektorar og 12 tilsette ved skuledirektørens kontor som reiste på tur til London for å sjå på det engelske skulesystemet. Programmet høyrast både vetugt og spanande ut. Nye impulsar kan ein stundom trenge nokon og ein kvar. Kunnskap er som kjend inga tung bør. Gjennomføringa av turen vart på eit vis noke amputert dersom Fevennen skriv det som sant er. Då kommunetoppane frå Kristiansand sklei inn på Oxford Street  synte det seg at det var haustferie i London. Trøytte kollegaer frå verdsmetropolen sat på ølstova og drakk Guinnes. Tankane deira var langt unna mønsterplan og den vesle multiplikasjonstabellen. Velfortent ferie. Alle skulane var lukka og låst. Lærarkollegiet frå sørlandsbyen laut klare seg sjølve.

Det er her nauteskapen frå reiseleiaren, Steinar Harbo frå skuledirektøren sitt kontor, slær ut i full blom. Han meiner beint fram turen var særs vellukka. I staden for å farte rundt i London så kunne pedagogane no sitje på hotellet medan ein privat innleidd konsulent kom innom resepsjonen og fortalde dei om skulane i London. Ja, ja – ein kan vel ikkje forlange all verda for 300 000 kommunale kroner… Kvifor ikkje vere ærleg. Heilt ærleg. Kalle ein spade for ein spade og seie at dette var eit reiseopplegg som ikkje på nokon måte heldt mål. Det er lov å stikke den lengste fingeren i jorda sjølv om ein er pedagog på øvste hylle.

 

Omtrent samstundes reiste to journalistar frå det vesle bygdebladet «moisund.com» på studietur til Polen. Me ville mellom anna lage ei reportasje om ei handlegate i den polske byen Krakow. På programmet stod og eit møte med tilsette i den polske avisa Gozeta Wyborcza.  Me vakna opp til Allhelgensdag. Ikkje noke kva som helst i eit katolsk land. Alt, absolutt alt var stengd. For oss var reportasjeturen spolert. Sjølvsagt kunne me ha invitert ein lokal kjøpmann –eller to opp på hotellromet og så kunne han ha fortald oss om handelsstanden i  «Ulika Dominikanska.» Me kan vere ærlege fordi heile turen vart kosta av eigen lønskonto. Det vert likevel gjeve høve til å vere ærleg sjølv om det er Per Sigurd Sørensen som styrer kontoen. Det fyer nok eit grann meir ansvar med ei offentlege, kommunale reisekasse.

Neste gong rektorane i byen skal på studietur kan dei reise t.d. til Hovden. Setesdalen er på sitt vakraste om våren. Der kan dei studere t.d. sport og friluftsliv, med hovudvekt på alpine greiner. Det er ikkje noke problem om snøen er bråna og skiheisen er stengd. Det er då berre å få leigd inn ein privat konsulent som kan kome innom Hovdestøylen og fortelje om korleis ein best renn på slalåmski eller  stend på snøbrett. Då slepp kommunetoppane å valse rundt på Hovden. På same måte som dei slapp å valse rundt i London. Me ynskjer likevel god tur. Heilt ærleg så gjer me det.

Merk: Ein skuldar å gjere merksam på at same dag som 50 skulefolk frå Kristiansand reiste til London for å studere engelsk haustferie, så la rådmannen i byen fram eit budsjettforslag med kraftige nedskjeringar i skulesektoren…….

Illustrasjonsfoto