Bill Abusland – utflytta Honndøl

Ukrut forgjeng ikkje så lett.

Redaksjonen he tidlegare etterlyst bilete frå elgjakta. No byrjer folk å vakne, den fyrste spaninga er utløyst, og det kjem stadig inn bilete frå stolte elgjegarar. Denne gongen frå jaktlaget på Åpåsland. Den røynde friluftsmannen, elgjegeren og skulesjefen Bill Abusland var den 9.oktober på heimlege trakter i hop med elgbikkja ”Tuva.” Bill var hundeførar og etter kort tid fekk bikkja los. Alt gjekk etter boka slik det høver seg ein mann av dette kaliber. Etter ein los på om lag 10 minutt kom Jan frå Slettefet krypande frametter blåberlyngen. Heilt utan nerver, roleg som ein sokneprest midtvegs i liturgien. Jan krumma ein av dei stutte, avrivne fingrane kring avtrekkaren. Det small voldsomt. Lauvet drøsa av ospeskogen og den velvaksne elgoksen, med 6 taggar på hovudet, stupte i bakken. Bill og Jan kunne nevast. Tuva fekk sin velfortente ros, og truleg ein aldri så liten smak av ferskt elgkjøt.

Foto: Jan i Slettefet