Agder Energi

Kan kome vindmøllepark i Evje & Hornnes kommune.

Han kom til sine eigne, og dei tok vel i mot han. Jo Drivdal er framleis ein omtykt mann i korridorane på kommunehuset på Evjemoen. Den tidlegare rådmannen er no tilsett i Agder Energi innanfor fagfeltet vindkraft. Det var nettopp vindmøller som stod i fokus då Heradstyret var samla til møte på ein regntung fredag, den 3. oktober.

Agder Energi ynskjer å utvikle vindkraft i eit nært samarbeid med grunneigarar, kommunar og andre offentlege maktsenter. Selskapet he som mål å vere ein langsiktig medspelar som utvikler, byggjer og drifter moderne vindkraftanlegg.

 

 

Drivdal hadde  etter få minutt heile møtelyden, Aud Helene Austegard medrekna, i si hole hand. Velvalde ord, glimt i augo og fantastiske ljosbilete gjorde sitt til at unge Drivdal kunne gjere vendereis til byen med sigeren i lomma. Heradstyret tykte bodskapen om vindmøller var spanande. Uhyre spanande. Mykje talar for at Agder Energi no vil riggje seg til med ein mellombels målestasjon ein eller annan stad i kommunen. Berre slik kan dei få dokumentert om det verkeleg er lønsemd i kommersiell drift av vindmøller i Evje og Hornnes kommune. Det er såleis eit ope spørsmål om det no er ein vindmøllepark på Svaba eller på Bertesknapen som  til sjuande og sist kan hindre ei utbyggjing og ei rasering av Fennefossen. Mykje tyder på den gamle ringreven Jo Drivdal endå ei gong vert ein redningsmann for kommunen.

Jon Olav Uleberg representerer den nye samskipnaden ” Tverrpolitisk Bygdeliste.” Ein røynd lokalpolitikar. Høgskuleutdanna, sundt folkevet og tåleg grei å tale med. Uleberg hadde likevel noke vanskeleg for å skjøne kvifor Agder Energi vil byggje vindmøller i Indre Agder. Han meinte at dei høgst truleg ville finne meir vind, og meir stabil vind på både Flekkerøya og Odderøya. Jo Drivdal gjorde greie for denne problemstillinga.  Jon Olav Uleberg vart tagal.

Dreng Homme, Sosialdemokrat på sin hals, var på talarstolen 13 gonger i løpet av møtet. Til sist skjøna Dreng at vindmøller beint fram kan vere framtida for kommunen vår. Også økonomisk. Det er beint fram så du ser dollarteikn i båe augo på den populære valldølen.

Det vart ein interessant og god informasjon frå Agder Energi. Med solid ryggdekning frå Heradstyret tyder mykje på at verksemda no kjem til å halde fram med planarbeidet med lokal vindkraft i Evje & Hornnes. Lokalisering av eit slikt anlegg er framleis heilt uviss. Her eit bilete frå Hannåsfjellet på Moisund. Kan hende ein mogleg vindmøllepark vert ståande nettopp her. I desse dagar framstår heile Moi som eit blindgjengerfelt. Heile næringslivet er lamma og sjølv noke så uskyldig som plenklypping vert rekna som ein risikosport. I denne vanskelege situasjonen for lokalsamfunnet er det kan hende luftbasert næringsverksemd som vert sjølve redningsplanka.....