On & Offshore Services as

Offshore verksemd satsar tungt i Evje & Hornnes kommune

On & Offshore Services er ei verksemd med spisskompetanse innanfor mange fagområde når det gjeld m.a. oljeutvinning i Nordsjøen. Verksemda er lokalisert i Kristiansand og tel i dag kring 150 tilsette. Dette er ei verksemd som legg ned store ressursar i å utdanne eigne fagfolk.  Samstundes gjev On & Offshore Services  tilbod om utdanning  og opplæring for tilsette i eksterne firma. Berre dei beste folka er gode nok når det vert kniva om store kontrakter på sokkelen

Me treff  Erik Zahl på ” Evje Park” der kring 10 tilsette frå On & Offshore Services er i gong med å avleggje ein avsluttande eksamen innanfor fagområdet Hydraulikk. Zahl er ein av dei som he ansvar for utdanningsbolken hjå den stadig veksande verksemda. Han, og dei tilsette, trivast svært godt i bygda. Dette er eit samarbeid med m.a. Setesdal Vidaregåande Skule – eit samarbeid som Zahl skryt voldsomt av. ” Me er mottekne med opne armar frå fyrste dag.”

Gjestfridomen i bygda er eit av argumenta for å flytte denne undervisningsbolken frå byen – og inn i landet. Det same gjeld prisnivået. Her kan me arrangere 3 vekers kurs, med kost og losji, for ein tredjedel av kva det kostar nede ved kysten seier ein svært så nøgd ”skulesjef.” Eit anna viktig moment er fritidtilboda i nærmiljøet her. Sunne og aktive tilbod gjer at elevane stiller friske og raske på skulebenkjen neste morgon, seier Erik Zahl med eit lurt smil.

Erik Zahl legg ikkje skjul på at verksemda er komen til kommunen med tanke på eit langsiktig perspektiv. Han går ikkje i detalj men avslører heilt klart at det no vert arbeid med å byggje opp eit kurs og kompetansesenter for offshoremarknaden, nettopp i vår kommune.  Målet er mellom anna ei fullskala utdanning i ”Fluid Teknikk. Noko tilsvarande finnes ikkje i dag i vårt langstrakte land. Erik Zahl smiler, ser meg inn i augo og seier: ” Dette kan bli stort, veldig stort.” Erik meiner alvor. På hi sida av dynna sit 10 oljearbeidarar og sveittar. Dei er oppe til eksamen etter 3 veker og 120  timars undervisning i hydraulikk. Oljeindustrien he slått rot på Evje. Her vert dei verande.